నా ఊహల సమాహారం

నా మూడో చంధో పద్యం - తిరుమొళిశై ఆళ్వారుల దివ్య పాశురం

2012-01-22T09:35:00.000-08:00

వైష్ణవాన్ని ఉజ్జీవింప చేసిన వారిలో ఆళ్వారులు ప్రముఖులు.

ఈ పన్నిద్దరు ఆళ్వారుల లోనూ తిరుమొళిశై ఆళ్వారులది ప్రత్యేక స్థానం.

తిరుమొళిశై ఆళ్వారులు శ్రీమన్నారాయణుని ఆయుధమైన సుదర్శన చక్ర అంశలో జన్మించారు.

వీరు మొదట శ్రీ వైష్ణవ మతాన్ని అవలంబించినా, స్థిర చిత్తము లేక ఎన్నో మతాలు అవలంబించారు. వీరు శైవ మతాన్ని కూడా స్వీకరించి ఆ మతం పై గ్రంధాలు కూడా రచించారు. అందుకే వీరికి శివాక్యర్ అనే పేరు కూడా వచ్చింది.

కానీ ఒకనాడు పేయాళ్వారులు వీరికి జ్ఞానోదయం కలిగించి వీరిని మరలా శ్రీ వైష్ణవం లోనికి మార్చారు.

అప్పటి నుండీ ఎంతో భక్తి ప్రపత్తులతో ఆ నారాయణుని పూజించి తరించారు.

హనుమంతుడు తన హృదయం చీల్చి సీతా రాములను చూపించినట్టుగా ఈ ఆళ్వారులు కూడా ఒకానొక సందర్భం లో తన హృదయ మందిరం లో కొలువై ఉన్న శ్రీమన్నారాయణుని అందరికీ దర్శింప చేసారు.

ఈ ఆళ్వారులు పరతత్త్వ నిర్ణయం చేస్తూ ద్రవిడం(తమిళం) లో చెప్పిన ఒక దివ్య పాశురం

కురై కొండు నాన్ముగన్ కుండిగై నీర్ పెయ్‍దు

మరైకొండ మంతిరత్తల్ వాళ్‍త్తి

కరైకొండ కండత్తాన్ శెన్నిమేల్ ఏరక్కళువినాన్

అండత్తాన్ శేవడియై ఆంగు

అంటే

వామనావతార విజృంభణా వేళ బ్రహ్మాండమంత ఎత్తు పెరిగిన నారాయణుడు పైకి తన శ్రీ పాదమును చాచగా, బ్రహ్మ దేవుడు ఆ పాదమును తన కమండలం లోని నీటితో పురుష సూక్తం చదువుతూ ప్రక్షాళన చేసాడు. ఆ నీటినే శివుడు తన తలపై గంగగా ధరించాడు. కనుక ఈ ముగ్గురిలో పురుషోత్తముడెవరో తెలుసుకోండి అంటూ పాఠకులకే వదిలేసారు.

సాధారణంగా ఎవరైనా గొప్పవారికి పాద పూజ చేసేటప్పుడు వారి పాదాలు కడిగి ఆ శేష జలాన్ని మన తలపై ధరిస్తాం. ఇక్కడ పాదాలు శ్రీహరివైతే , కడిగిన వారు బ్రహ్మ, శిరసు పై ప్రోక్షించుకున్న వారు శివుడు.

కనుక ఈ ముగ్గురిలో పర దైవం ఆ శ్రీహరే అని చెప్పకనే చెప్పారు.

ఈ పాశురాన్ని నేను తెలుగులోకి అనువదించాలి అనుకొని ఈ క్రింది ఆటవెలది పద్యం వ్రాసాను.

ఆ.వె|| ఒకడు పదము ఎత్తి ఉర్వి నభము నిండ

ఒకడు అట్టి పదము నొనర కడిగె

ఒకడు అట్టి జలము నొప్పుగా తలదాల్చె

ఎవరు ఇందు ఘనులు ఎంచి చూడ

ఈ పద్యం లో కానీ, టపా లో కానీ ఏమన్నా దోషాలుంటే దయచేసి తెలుపగరు. సరిదిద్దుకుంటాను.

ఇక శెలవు.

నా రెండో చంధో పద్యం

2011-12-28T09:33:00.000-08:00

కొన్నాళ్ళ క్రితం నేను ఈ పద్యంతో నా చంధో ప్రయాణం ప్రారంభించాను.

ఈ పద్యం నడక బాగున్నా యతి నియమం పాటించటంలో నేను అంత శ్రద్ధ చూపలేదు.

ఇక తర్వాత యతి నియమం కూడా పాటించి ఈ పద్యాన్ని మార్చి రాద్దామని అనుకున్నా అది కార్యరూపం దాల్చలేదు.

ఈ మధ్యన రామాయణంలో అహల్యా శాప విమోచన ఘట్టం చదువుతున్నప్పుడు "ఈ పాదాలకు రాతిని నాతి చేయగలిగే మహిమ ఎలా అబ్బి ఉంటుంది?" అనే ప్రశ్న నాలో ఉదయించింది.

ఈ ప్రశ్నా దాని సమాధానం ఒక పద్యంలా రాయాలని సంకల్పించి ఇదిగో ఈ క్రింది ఉత్పలమాల పద్యం వ్రాసాను.

ఉ|| రాతిని నాతి చేసిన పదమ్ములు నావను మోపగా అదే

రీతిగ మారునో యను గుహాగ్రణి శంకలు సత్యమే సుమీ!

ప్రీతిగ లోకమాత యగు ఇందిర హస్తము లొత్తు అంఘ్రికిన్

పాతకముల్ హరించెడి మహాత్మ్యము లబ్బుట వింత గాదులే

ఈ పద్యంలో కూడా మొదటి పద్యం లానే యతి కుదరలేదు. కానీ ఈ సారి వదలకుండా ప్రయత్నించి ఈ పద్యాన్ని యతి ప్రాసలు కుదిరేలా ఇలా మార్చాను.

ఉ|| రాతిని నాతి చేసిన సుర హ్రద పితృ పదమ్ము నావనే

రీతిగ మార్చునో యనుచు రేగిన శంకలు సత్యమే సుమీ!

ప్రీతిగ లోకమాత మురిపెమ్ముగ యొత్తెడు దివ్య అంఘ్రి వి

ఖ్యాతిగ పాతకమ్ములు నఘమ్ములు మాపుట వింత గాదులే

నేను ఈ పద్యం తీసుకుని ఆనందంతో నాకు తెలిసిన ఒక పెద్దాయన దగ్గరకు వెళ్ళాను. ఆయన చంధో పద్యాలు రాయటంలో దిట్ట. ఆయన ఈ పద్యం చూసి ఇందులో కొన్ని దోషాలు ఇలా చెప్పారు

1. మూడో పాదంలో ’దివ్య అంఘ్రి’ సంధి కలిసి ’దివ్యాంఘ్రి’ అయిపోతుంది.కాబట్టి ఇలా విడిగా వాడకూడదు.

2. నాలుగో పాదంలో ’పాతకమ్ములు నఘమ్ములు’ అన్నప్పుడు ఒకే విషయాన్ని మరలా మరలా చెప్పటం వలన పునరుక్తి దోషం కలిగింది.

అయితే ఈ రెంటి కన్నా పెద్దదీ, అసలైందీ ఒక తప్పు ఉంది.

మొదటి పాదంలో ’పితృ పదమ్ము’ అనే పదంలో ’తృ’ ని సంయుక్తాక్షరంగా భావించి దాని ముందరి అక్షరమైన ’పి’ ని గురువు(U) గా స్వీకరించబడింది.

కానీ అసలు విషయమేంటంటే ’తృ" అనేది సంయుక్తాక్షరం కాదు. అది త గుణింతంలో వస్తుంది. కాబట్టి ’పి’ గురువు కాదు. దానితో అక్కడ రావలసిన ’భ’ గణం కాస్తా ’న’ గణం అయ్యి పద్యం ఉత్పలమాల కాలేదు.

ఇంకేం చేస్తాం. కొంచం కుస్తీ పట్టి ఆ దోషాలన్నీ సరి చేసి చిన్న చిన్న మార్పులు చేస్తే ఆ పద్యం ఇలా వచ్చింది.

ఉ|| రాతిని నాతి చేసిన సుర హ్రద జన్యు పదమ్ము నావనే

రీతిగ మార్చునో యనుచు రేగిన శంకలు సత్యమే సుమీ!

ప్రీతిగ లోకమాత మురిపెమ్ముగ నొత్తెడు పాద పద్మముల్

ఖ్యాతిగ లోకవాసుల నఘమ్ములు మాపుట వింత గాదులే!

ఈ పద్యం నాకైతే బాగానే నచ్చింది.

మీ అభిప్రాయం చెప్పండి.

కాళిదాసు గురించి - 2: భోజనం దేహి రాజేంద్రా!

2009-12-18T07:19:00.000-08:00

కాళిదాసు గురించిన ఈ కథ బాగా ప్రచారం లో ఉంది.
భొజ రాజు పాటలీపుత్రాన్ని పరిపాలిస్తున్నప్పుడు కాళిదాసు ఆయన ఆస్థానంలో ఉండేవాడు. ఆ రాజ్యంలోనే ఒక పల్లెలో ఒక పేద బ్రాహ్మణుడు ఉండేవాడు. ఆయనకి రోజు గడవటమే కష్టంగా ఉండేది.
అలా భారంగా రోజులు నెట్టుకొస్తున్న ఆ బ్రాహ్మణుడికి రాజు గారిని కలిసి చెప్పుకుంటే ఏదో ఒక సహాయం తప్పక చేస్తారు అని ఎవరో చెప్పారు. అంతే కాక రాజు గారు కళా పోషకుడనీ, సామాన్యంగా కన్నా కవులకైతే త్వరగా దర్శనం ఇవ్వవచ్చు అని సలహా కూడా చెప్పారు. ఏం చేస్తాడు ఈ పేద బ్రాహ్మణుడు. తనైతే కవి కాదు కదా. తనకు తెలిసిన విద్య అంతా కూడదీసుకుని శ్లోకంలో ఒక పాదం వరకూ వ్రాయగలిగాడు. ఆయన వ్రాసింది ఏంటంటే
"భోజనం దేహి రాజేంద్రా ఘృత సూప సమన్వితం" అని.
అంటే ఓ రాజా! పప్పూ, నేతితో కూడిన భోజనాన్ని (నేను నిన్ను) అర్ధిస్తున్నాను" అని.
ఎంత ప్రయత్నించినా ఆ బ్రాహ్మణుడు రెండో పాదాన్ని పూర్తి చెయ్యలేక పోయాడు.
అయినా ఏదో ఒక ఆశతో రాజధాని చేరుకున్నాడు. రాచ వీధిలో తిరుగుతూ తను రాసిన శ్లోక పాదాన్నే తలుచుకుంటూ రెండో పాదం పూరించటానికి శతవిధాలా ప్రయత్నం చేస్తున్నాడు. అలా అతను అటుగా వెళ్తున్న కాళిదాసు కంట పడ్డాడు. అతని దగ్గరికి వెళ్ళి విచారించి విషయం తెలుసుకున్న కాళిదాసు చాలా బాధ పడ్డాడు. వెంటనే అతని చేతిలోని తాళపత్రం తీసుకుని
"మాహిషంచ శరచ్చంద్ర చంద్రికా ధవళం దధీ" అని ఆ శ్లోకాన్ని పూరించి ఇచ్చి, ఇది చూపించి రాజు గారి దగ్గర సహాయం పొందమని చెప్పి వెళ్ళిపోయాడు.
ఇప్పుడు మొత్తం శ్లోకం
"భోజనం దేహి రాజేంద్రా ఘృత సూప సమన్వితం
మాహిషంచ శరచ్చంద్ర చంద్రికా ధవళం దధీ" అని ఒక రూపానికి వచ్చింది.
అంటే "ఓ రాజా! పప్పూ, నేతితో కూడిన భోజనాన్ని (నేను నిన్ను) అర్ధిస్తున్నాను. వీటితోపాటు శరత్కాల పున్నమి నాటి చంద్రుడేమో అని భ్రమింపజేసే గడ్డకట్టిన తెల్లని గేదె పెరుగు కూడా" (అర్ధిస్తున్నాను).
ఈ శ్లోకాన్ని చూసుకుని బ్రాహ్మణుడు ఎంతో ఆనందంతో రాజు గారి దగ్గరికి తీసుకెళ్ళి చదివి వినిపించాడు.
రెండో పాదం వినగానే అది కాళిదాసు వ్రాసాడని రాజుకి అర్ధం అయిపోయింది.గట్టిగా గద్దించితే, మొదటి పాదం వరకే తాను రాసాననీ, రెండో పాదం మాత్రం కాళిదాసు రాసాడని సభలో ఉన్న కాళిదాసుని చూపించాడు. రాజు వెంటనే ఆయన రాసిన మొదతిపాదానికి, ఆయన అర్ధించినట్టుగానే భోజనం పెట్టించాడు. రెండో పాదానికి మాత్రం అక్షర లక్షలు ఇచ్చి సత్కరించి పంపాడు.

కొసమెరుపు: పూర్వ కాలంలో ఆవు పాలని ఎక్కువ వాడేవారు. అందునా బ్రాహ్మణులు పూజలూ, పునస్కారాలూ, అభిషేకాలూ అన్నీ ఆవు పాలతోనే చేసేవారు. మరి అలాంటప్పుడు కాళిదాసు గేదె(మాహిషంచ) పెరుగు ఇమ్మని రాయటంలో ఆంతర్యం ఏంటో నా మట్టి బుర్రకు చానాళ్ళు భోధపడలేదు. చివరికి ఉగ్గబట్టలేక నాకు తెలిసిన ఒక పెద్దాయన దగ్గర నా బాధ అంతా వెళ్ళగక్కేసాను. ఆయన చిన్నగా నవ్వి "నాయనా! ఆవు పాలు శ్రేష్టమైనవే అయినా గేదె పెరుగు తోడుకున్నంత గట్టిగా తోడుకోదు. అందుకే ఆయన గడ్డలా తోడుకున్న గేదె పెరుగు ఇమ్మని రాసింది" అని చెప్పారు.
ఈ సమాధానంతో అప్పటి దాకా నన్ను పీడిస్తున్న ఈ శంకా భూతం దెబ్బకి వదిలిపోయింది, "దండం దశగుణం భవేత్" అన్నారు కదా పెద్దలు.

ఈ రోజుకి మరి సెలవు.
ఇంకో కథతో మళ్ళీ కలుద్దాం.

బ్రౌజర్ల పై చెణుకులు

2009-12-16T05:26:00.000-08:00

ఈ రోజు అంతర్జాలంలో గమ్యం లేని బాటసారిలా విహరిస్తుంటే ఇది చూసాను. నేనైతే గట్టిగా నవ్వుకున్నాను.
మీరు కూడా హాయిగా నవ్వుకోండి.
ఇక్కడ ఇంకా ఇక్కడ నొక్కండి

కాళిదాసు గురించి -1 : కోహం రండే?

2009-12-15T06:30:00.000-08:00

కాళిదాసు గురించి తెలియని భారతీయులు ఉండరంటే అతిశయోక్తి కాదేమో. ఉపమాలంకార ప్రయోగంలో ఆయనకి ఆయనే సాటి. అందుకే ఆయన గురించి చెప్పేటప్పుడు "ఉపమా కాళిదాసః" అంటారు.
కాళిదాసు గురించి ఎన్నో కధలు ప్రచారంలో ఉన్నాయి. ఆయన విక్రమాదిత్యుని నవరత్నాలలో ఒకడని కొంతమందీ, భోజ రాజు ఆస్థానంలో ఉండేవాడని కొంతమందీ అంటారు.

ఏది ఏమైనా కాళిదాసుని "Indian Shakespeare" అనటం మాత్రం చాలా అన్యాయం. మన కవులని వాళ్ళతో పోల్చి మనని తక్కువగా చూపించటమే ఇందులో బ్రిటీషు వాళ్ళ ముఖ్య ఉద్దేశ్యం.
కాళిదాసు గురించి నేను విన్న, చదివిన విషయాలు మీతో పంచుకోవాలని ఈ టపా మొదలు పెడుతున్నాను.
సరే ఇక ఈ రోజు కధలోకి వెళ్తే
భోజ రాజు ఆస్థానంలో కాళిదాసు తో పాటు భవభూతి, దండి అని ఇద్దరు కవులు ఉండేవారు. ఈ ముగ్గురూ ఎవరికి వారే సాటి. అలాంటిది ఒకసారి వాళ్ళ ముగ్గురిలో ఎవరు గొప్ప అనే చర్చ బయల్దేరింది, విషయం చినికి చినికి గాలి వానై భోజ రాజు దగ్గరకు వెళ్ళింది. ఆయన కూడా ఈ విషయంలో ఓ నిర్ణయానికి రాలేక చేతులెత్తేసాడు. ఇక మనం ఆ కాళీ మాతనే అడిగి తెలుసుకుందాం అని ముగ్గురూ కాళీ మాత ఆలయానికి బయలుదేరారు,కాళిదాసు నాలుక పై బీజాక్షరాలు వ్రాసి ఆయని కవిగా తీర్చిదిద్దింది సాక్షాత్తూ ఆ కాళీ మాతే. తప్పకుండా నేనే గొప్ప కవి అని తీర్పు చెప్తుంది అని మనసులో అనుకుంటూ ఆనందపడసాగాడు కాళిదాసు. ముగ్గురూ ఆలయానికి చేరుకుని తమ వివాదాన్ని నివేదించి అమ్మ ఏం చెప్తుందో అని ఆసక్తిగా ఎదురు చూస్తున్నారు.
ఇంతలో అమ్మవారి విగ్రహం నుండి మాటలు వెలువడ్డాయి
"కవిర్దండీ కవిర్డండీ భవభూతీ పండితః" అని ఆగింది కాళీ మాత
అంటే దండి కవి, భవభూతి పండితుడూ అని వాళ్ళ ఇద్దరి గురించీ చెప్పింది కానీ కాళిదాసు గురించి అస్సలు చెప్పలేదు. ఒకపక్క దండీ, భవభూతీ మురిసిపోతుంటే కాళిదాసు మాత్రం నిశ్చేష్టుడయ్యాడు. తనని కవిని చేసి ఆశీర్వదించిన అమ్మ ఇలా అవమానిస్తుందని ఊహించని కాళిదాసు పట్టరాని కోపంతో
"కోహం రండే?" అని గట్టిగా కాళీ మాతనే అడిగాడు.
(అంటే నేనెవరినే ...(రండ అనేది ఒక బూతు మాట) )
కాళిదాసు ఇలా అనేసరికి దండీ, భవభూతీ నిశ్చేష్టులై అలాగే నిలబడి పోయారు.
వెంటనే కాళీ మాత "త్వమేవాహం త్వమేవాహం కాళిదాసో త్వమేవాహం" (అంటే నువ్వే నేను, ఓ కాళిదాసా) అని బదులిచ్చింది.
తను చేసిన తప్పు గుర్తించిన కాళిదాసు ఎంతో సిగ్గుపడి తనని క్షమించమని వేడుకుంటూ కాళికా దేవిని ఎన్నో రకాలుగా కీర్తించాడు. అయినా పిల్లవాడు తప్పు చేస్తే ఏ తల్లైనా కోపం తెచ్చుకుంటుందా?
సాక్షాత్తూ అమ్మవారే కాళిదాసు గొప్పతనం గురించి చెప్పటంతో మిగిలిన ఇద్దరికీ అది ఒప్పుకోక తప్పలేదు,
ఇదండీ ఈ రోజు కధ.
మరో కధతో మళ్ళీ మీ ముందుకు వస్తాను.
అంతవరకూ శెలవు

వారెవా ఏమి ఫేసు

2008-12-03T03:48:00.000-08:00

మనీ చిత్రంలోని ఈ పాట మీరంతా వినే వుంటారు. ఈ పాటలో బ్రహ్మానందం ని మునగ చెట్టు ఎక్కించేస్తూ ఉంటాడు తనికెళ్ళ భరణి.
ఈ రోజు ఈ పాట వింటున్నాను. ఆశ్చర్యం. ఈ పాటలో వినిపించే రెండు మూడు గొంతుల్లో గురువుగారు సీతరామశాస్త్రి గారి గొంతు ప్రస్ఫుటంగా, ప్రత్యేకంగా వినిపించింది. నిజమో కాదో అని రెండు మూడు సార్లు విన్నాను. అవును గురువు గారే.
మీరు గమనించే ఉంటారు. కానీ మీ అందరితో ఈ విషయాన్ని పంచుకోవాలని అనిపించి ఈ టపా రాస్తున్నాను.
మీరు గమనించి ఉండకపోతే ఒకసారి వినండి.

అమెరికా జెండా గురించి కొన్ని నిజాలు

2008-11-29T08:16:00.000-08:00

ఈ రోజు గూగుల్ వీడియోలో Illuminati గురించి ఈ వీడియో చూస్తున్నాను.ఇది Illuminati మీద ఏదో యూనివర్శిటీ లో జరిగిన లెక్చర్ అనుకుంటా.ఇందులో ప్రసంగించిన "Jordan Maxwell" జార్జ్ బుష్ గురించి చాలా ఘాటుగా విమర్శలు చేసాడు. ఆయన చెప్పిన విషయాలలో కొన్ని ఇక్కడ ప్రస్తావిస్తున్నాను.
"Adolf hitlerr rose to power with arms as george bush does.I am ashamed of the people of this country who call themselves Americans, who drive having a silly US flag on their cars without realizing that its not a US flag. The original United states flag has the stripes going vertical not horizontal. .
ఇది వినగానే చాలా ఆశ్చర్యం వేసింది. నిజమేనా? జార్జ్ బుష్ తన దేశపు జెండా గురించి అంత అలసత్వంతో ఉంటాడా? ఆయన అంత అలసత్వం చూపించినా ప్రజలూ, మీడియా ఊర్కుంటాయా? ఇలా ఎన్నో ప్రశ్నలు. గూగుల్ వెతుకులాటలో దొరికిన అన్ని బొమ్మల్లోనూ జెండాలో చారలు అడ్డంగానే ఉన్నాయి. చివరికి లండన్‍లో అమెరికన్ ఎంబసీ వారి అధికారిక వెబ్ సైట్ ఈ పేజిలో కూడా తమ జెండాకి చారలు అడ్డంగానే(horizontal) ఉంటాయని స్పష్టంగా చెప్పేసింది. కానీ ఈ విషయం గురించి కొన్ని ఆశ్చర్యకరమైన విషయాలు చర్చించారు. దీని నుంచీ నేను గ్రహించిన వివరాలు సంగ్రహంగా ఇవీ
అమెరికా స్వతంత్ర దేశంగా అవతరించిన తరువాత దేశ చిహ్నాలుగా రెండు జెండాలను తయారు చేసారట. సైనిక ఉపయోగాల కోసం అడ్డ చారలుండే జెండాలనీ, సాధారణ అవసరాల కోసం నిలువు చారలుండే జెండానీ తయారు చేసారట. అయితే ప్రభుత్వం ఈ అడ్డ చారల జెండాలే ఎక్కువ తయారు చేయిస్తుండటంతో నిలువు చారల జెండల తయారీ కూడా తగ్గింది. పైగా నిలువు చారల జెండాల ధరలు కూడా ఎక్కువ ఉండటంతో వాటికి ఆదరణ తగ్గింది. అలా అలా 1980 కల్లా అసలు ఈ నిలువు చారల జెండా గురించి అన్ని తరగతి పుస్తకాల నుంచి కూడా తొలగించారట.

నిలువు చారల జెండా

అడ్డ చారల జెండా

నా మొదటి ఛందో పద్యం

2008-09-25T23:43:00.000-07:00

మొన్న కొత్తపాళీ గారు ఇచ్చిన ఈ ఇతివృత్తం చూసినప్పుడు నాకు “సిరికిన్ జెప్పడు” లాగా లక్ష్మీ దేవి తన భక్తులను రక్షించటానికి వెళ్ళే సన్నివేశాన్ని అదే ఛందస్సులో రాయాలన్న ఊహ వచ్చింది. చాలా కష్టపడ్డాక చివరికి ఈ పద్యం రాయగలిగాను. ప్రాస అయితే కుదిరింది కానీ యతి కుదరలేదు.

మ|| హరికిన్ జెప్పదు కైటభారి పదముల్ సంప్రీతి సేవింపదే

సురపుష్పమ్ములు బెట్టదన్యములు ఆలోచింపదాందోళనా

భర మంజీరములొగ్గగా గనదు పాలార్ణమ్మునన్ దిన్న వే

లరుచుల్వెన్నలు అంటగా దుడువదా భక్తావనోత్సాహియై

తన భక్తులని రక్షింప ఉద్యుక్తయైన లక్ష్మి, ఆ హరికైనా చెప్పక, తాను ఎంతో ప్రేమతో సేవించే విష్ణుమూర్తి పాదాలను సేవించక, తనకి ఇష్టమైన పారిజాతాలైనా పెట్టుకోక,మరే విషయముల గురించీ ఆలోచించకా,ఆందోళన నిండిన ఆమె పాదాల వడిని ఓర్వలేక జారుతున్న మువ్వలనైనా సరిజేయక, ప్రీతితో క్షీరసాగరంపై తేలేటి వెన్నలు తినగా పెదాలపై అంటుకున్న తరకలైనా తుడువక ఉన్నఫళంగా వడివడిగా, హడావిడిగా బయలుదేరింది.

ఈ ఇతివృత్తాన్నికి కథ కూడా మొదలు పెట్టాను. గడువు పొదిగించారు కదా, పూర్తి చెయ్యగలనని అనుకుంటున్నాను.

దేవుడు కూడా మోయలేని రాయి

2008-09-12T05:05:00.000-07:00

మొన్న ఈటీవీ-2 లో తెలుగు-వెలుగు కార్యక్రమంలో గరికపాటి నరసింహారావు గారు ఈ హాస్యోక్తి చెప్పారు. చాలా నవ్వు తెప్పించింది. మీ అందరితో ఆ ఆనందాన్ని పంచుకుందామని ఈ టపా రాస్తున్నాను.
ఒకసారి ఒక అవధానంలో అసందర్భ ప్రసంగంలో ఒక పృచ్ఛకుడు అడిగాడట "ఆ దేవుడు కూడా మోయలేని రాయి ఏది?" అని.
అప్పుడా అవధాని హాస్యంగా ఇలా చెప్పారట.
"ఆ దేవుడు కూడా మోయలేని రాయినే సంసారం అంటారు నాయనా. ఆ దేవుళ్ళు కూడా ఈ సంసార సాగరాన్ని ఈదలేకపోయారు. ఆ విష్ణుమూర్తినే చూడండి. ఆయనకీ ఇద్దరు భార్యలు. ఒకరేమో లక్ష్మీ దేవి. సుచల.ఎప్పుడు ఎవరి దగ్గర ఉంటుందో తెలియదు. ఇంకొకరు భూదేవి.అచల. స్థిరంగా ఉంటుంది తప్ప ఎక్కడికీ కదలలేదు. ఇక ఆ శివుడి సంసారాన్నే తీసుకుంటే ఆయన వాహనం ఎద్దు, ఆయన బార్య వాహనమేమో సింహం. ఆ సింహం ఈ ఎద్దుని ఎప్పుడు తినేద్దామా అని చూస్తూ ఉంటుంది. ఆయన పెద్దకొడుకు వినాయకుడి వాహనమేమో ఎలుక. శివుడి మెడలో ఉన్న పాము ఈ ఎలకని తిందామని చూస్తుంటే ఆయన రెండో కొడుకు కుమారస్వామి వాహనమైన నెమలేమో ఆ పాము వంక చూస్తుంటుంది ఎప్పుడు తిందామా అని. ఇలా వాహనాల మధ్య గొడవలతో సతమతమయ్యే ఆయనకి సవతులైన గంగాగౌరిల కయ్యాలు ఉండనే ఉన్నాయి. అందుకే నాయనా ఆ దేవుడు కూడా మోయలేని రాయి సంసారం తప్ప మరొకటి కాదు" అని హాస్యంగా సమాధానం చెప్పారట.

అన్నమయ్య పై నా బ్లాగు

2008-09-04T22:27:00.000-07:00

చివరికి నేను ఎన్నాళ్ళనుంచో అనుకుంటున్న అన్నమయ్య బ్లాగుని మొదలుపెట్టాను.
అన్నమయ్యకు అక్షర నీరాజనం అనే ఈ బ్లాగులో అన్నమయ్యకీర్తనలూ, ఆయన జీవిత విశేషాలూ, ఆయన రచనా వైభవం, వాటిలోని చమత్కారాలూ వీటి గురించి నాకు తెలిసిన విషయాలు రాస్తూ ఉంటాను.
ఈ బ్లాగుపై మీ అభిప్రాయాలు చెప్పగలరు.

ఫైర్‌ఫాక్స్ కి తెలుగులో ఓ మంచి పేరు పెడదాం

2008-08-22T04:19:00.000-07:00

మొన్న వీవెన్ గారి బ్లాగులో ఫైర్‌ఫాక్స్‌ని "మంట నక్క" అని ప్రస్తావించటం చూసాను.

ఆ పదంలో ఏమంత దోషాలు లేకపోయినా నాకెందుకో ఆ పేరు ఫైర్‌ఫాక్స్ కి అంతగా నప్పలేదేమో అనిపించింది.

ఫైర్‌ఫాక్స్‌ని తెలుగులో "జ్వాలా జంబూకం" అని కానీ "జ్వాలా శృగాలం" అని కాని అంటే ఎలా ఉంటుంది?

మీ అభిప్రాయాలు చెప్పండి..

నేనొచ్చేసా - మూడో సారి

2008-08-22T03:55:00.000-07:00

ఏంటో ఎప్పుడు బ్లాగుదామనుకున్నా ఏదో ఒక విఘ్నం. అందుకే ఈసారి విఘ్నేశ్వర ప్రార్ధన చేసి మరీ ప్రారంభిస్తున్నాను.ఇప్పుడు కూడా విఘ్నాలు వస్తే దీనికి పూచీ నాది మాత్రం కాదని సవినయంగా మనవి చేసుకుంటున్నాను.
భాను

ఏప్రిల్ 11 పెద తిరుమలయ్య జయంతి

2008-03-30T23:25:00.000-07:00

అన్నమాచార్యుల వారి సంకీర్తనా వారసుడు పెద తిరుమలయ్య అని అందరికీ తెలిసిన విషయమే.
ఆయన కూడా అన్నమయ్య లా ఎన్నో శ్రుంగార, ఆధ్యాత్మిక సంకీర్తనలను రచించారు.
ఆయన జయంతి ఏప్రిల్ 11 అట. నిన్న ఆంధ్రజ్యోతి ఆదివారం సంచికలో పెద తిరుమలాచార్యుని మీద ఒక చిన్న వ్యాసం వేసారు.
ఆ వ్యాసాన్ని ఇక్కడ చూడండి.
ఈ సందర్భంగా అందరం అన్నమయ్యనూ, వారి వారసుడు పెద తిరుమలయ్యనూ ఒక్కసరి స్మరించుకుందాం.

ఎం.ఎస్ రామారావ్ గారి సుందరాకాండ

2008-03-25T23:26:00.000-07:00

ఎం.ఎస్ రామారావ్ గారు గొప్ప గాయకులు.చాలా మందికి తెలియని విషయం ఆయన చలన చిత్రాలలోనూ చాల పాటలు పాడారని.
ఈనాడులో ఈ వ్యాసం చదివేదాక నాకూ తెలియదు.
తెలుగు,తమిళ,కన్నడ భాషల్లో ఆయన గాన ప్రస్థానం సాగింది.
కానీ ఆయనకి పేరు తెచ్చింది మాత్రం ఆయన రచించి పాడిన సుందరకాండ.ఎంతో శ్రావ్యంగా,మధురంగా సాగిపోతుంది. విశ్వనాథ సత్యనారాయణ గారు కూదా ఈయన సుందరకాండ విని ముగ్ధులయ్యారు.
మీరు కూదా ఎం.ఎస్ రామారావ్ గారి సుందరాకాంద వినాలనుకుంటే
ఇక్కడ దిగుమతి చేసుకోవచ్చు
మొదటి భాగం
రెండో భాగం
పుస్తక రూపంలో కావాలనుకుంటే ఇక్కడ నొక్కండి.

మరికొన్ని PDF పుస్తకాలు దిగుమతి చేసుకోండి

2008-03-24T04:09:00.000-07:00

అందరికీ శుభాకాంక్షలు.

నేను అప్‌లోడ్ చేసిన PDF పుస్తకాలు మీ అందరికీ నచ్చాయని ఆశిస్తాను.

మరికొన్ని PDF పుస్తకాలు ఈ క్రింద ఇస్తున్నాను.

మరికొన్ని PDF పుస్తకాలు

ఆ రాత్రి(చలం)

చుక్కమ్మ (చలం)

ఆరోజు రాత్రి ఏం జరిగిందంటే(భోపాల్ దుర్ఘటన గురించి వివరించే పుస్తకం)

గురజాడ రచనలు

డీప్‍సీ(సముద్రపు రహస్యాలను చెప్పే పుస్తకం) తెలుగు

మేఘసందేశము(కాళిదాస విరచితము టీకా తాత్పర్యములతో)

అమృతం కురిసిన రాత్రి(తిలక్)

డాన్ క్విక్సోట్

అల్పజీవి(రాచకొండ విశ్వనాధ శాస్త్రి)

వాగ్గేయకారుల తులనాత్మక పరిశీలన(ఆన్నమయ్యకూ ఇతర వాగ్గేయకారులతో పరిశీలన)

సొమన-అన్నమయ్య(అన్నమయ్యకూ నాచన సోమనకూ మధ్య పరిశీలన)

త్వరలో మరికొన్ని పుస్తకాలు ఎగుమతి చేస్తాను

తెలుగు ఈ-పుస్తకాలు డౌన్లోడ్ చేసుకొండి

2008-03-19T06:57:00.000-07:00

డిజిటల్ లైబ్రరీ ఆఫ్ ఇండియా(dli) వారు మన ప్రాచీన గ్రంధాలను కాపాడాలనే మహోద్దేశంతో వాటిని స్కాన్ చేసి దిజిటల్ రూపంలో భద్రపరుస్తున్నారు.
dli సైటుకు వెళ్ళాలంటే ఈ క్రింది లింకు నొక్కండి.
http://www.new.dli.ernet.in/

కాకపోతే ఈ పుస్తకాలన్నీ 'tiff ఫార్మాట్ లో ఉన్నాయి.ఎన్ని పేజీలుంటే అన్ని 'tiff' లన్నమాట.
నేను కొన్ని పుస్తకాలు డౌన్లోడ్ చేసి PDF లోకి మార్చి షేర్ చేసాను.
కావాలంటే మీరు కూదా ఆ PDF లు డౌన్లోడ్ చేసుకోవచ్చు.
కొన్ని PDF లు ఈ క్రింద ఇస్తున్నాను.
మీకు నచ్చితే మరిన్ని ఎగుమతి చేస్తాను.

1.కన్యాశుల్కము(గురజాడ వారి రచన)
2. చిల్లర దేవుళ్ళు(తెలంగాణా పోరాటాన్ని చిత్రించిన దాశరధి రంగాచార్య గారి నవల)
3.రెండు మహానగరాల కథ(చార్లెస్ డికెన్స్) తెలుగు అనువాదం

నేను చదివిన పుస్తకాలు

2008-03-19T05:57:00.000-07:00

నాకు పుస్తకాలు చదవటం అంటే పిచ్చి, వెర్రి, ఇంక దాన్ని పోల్చటానికి ఎన్ని ఉపమానాలుంటే అన్నీనూ.
నా మిత్రులైతే నన్ను పుస్తకాల పురుగు అని ముద్దుగా పిలిచేవారు.
నేను ఇప్పటివరకూ చాలా పుస్తకాలు చదివాను
అందులో తెలుగు సాహిత్యానికి సంబందించినవి, గ్రీకుపురాణాలకు సంబందించినవీ ఇంకా ఎన్నో ఉన్నాయి.
ఇక నుంచీ నేను చదివిన పుస్తకాలలోని విశేషాలు మీ అందరితో పంచుకుంటాను.

నేను ఈ సారి చెప్పబోతున్న పుస్తకం: హంసగీతం.
ఈ పుస్తకం గురించి చిన్న పరిచయం
ఇది వివిన మూర్తి గారి కలం నుండి జాలువారిన చారిత్రిక నవల. ఇతివౄత్తం శ్రీనాథ కవి సార్వభౌముని జీవిత చరిత్ర.ఇది "రచన" పత్రికలో సీరియల్ గా ప్రచురించబడింది.
ఆ నవల ఆవిష్కరణ సమయంలో "హిందూ" పత్రిక లో వచ్చిన ఈ సమీక్ష చూదండి.
http://www.hindu.com/br/2003/10/28/stories/2003102800030201.htm

దీని గురించి మరింత వివరంగా మరో ప్రచురనలో వివరిస్తాను.
చివరిగా ఒక చిన్న మాట.
ఇది నేనేదో ఆ పుస్తకానికి రాసే సమీక్ష కాదు.నాకు అంతటి పాండిత్యమూ లేదు, ఆ అర్హతా లేదు.
నేను పుస్తకాల్లో చదివి తెలుసుకున్న విషయాలని మీతో పంచుకోవాలని చేసే చిరు ప్రయత్నం మాత్రమే.

ఉంటాను...

తెలుగు బ్లాగర్లలో మరలా చేరిక

2008-03-19T02:51:00.000-07:00

అందరికీ శుభాకాంక్షలు.
ఇది నేను చాన్నాళ్ళ తర్వాత బ్లాగుతున్న ప్రచురణ.
ఇక నుంచీ నేను కూడా క్రమం తప్పక బ్లాగటానికి ప్రయత్నిస్తాను.

నవకవితా సంకలనం-2008

2007-11-01T21:16:00.000-07:00

చైతన్యభారతి వారు పరస్పర సహకార పద్ధతిలో ఒక కవితాసంకలన్నాన్ని ప్రచురించదలిచారు.ఆ కవితాసంకలనం కోస్సం వారు కవితలను ఆహ్వానించుచున్నారు.వారు కవితలను ఆహ్వానిస్తూ చేసిన ప్రకటనని మీరు ఈ క్రింద చూడవచ్చు.ఆసక్తి ఉన్నవారు చైతన్యభారతివారిని సంప్రదించి మీ కవితలను పంపగలరు.

ఓం అక్షరాయ నమః

2007-03-21T03:20:00.000-07:00

ఇది శ్రీ మంజునాధ చిత్రం కోసం భారవి గారు రాసిన పాట. ఈ పాట అంతా శివ స్తోత్రాలతో ఉంటుంది. ఇవన్ని మనకి తెలిసిన స్తోత్రాలే అయినా ఈ పాటకి ఒక ప్రత్యేకత ఉంది. ఈ పాట లోని స్తోత్రాలన్నీ వర్ణమాలా క్రమంలో ఉంటాయి. అంటే ఓం అక్షరాయ నమః, ఆద్యంతరహితాయనమః, ఇందీవరదళశ్యామాయనమః, ఈశ్వరాయనమః ... ఇలా అ, ఆ, ఇ, ఈ, ... వర్ణమాల లోని అక్షరాలతో సాగిపోతుంది ఈ పాట. ఇలా స్తోత్రాలన్నిటిని కష్టపడి వర్ణమాలా క్రమం లో అమర్చిన భారవి గారిని ఎంత పొగిడినా తక్కువే అవుతుంది.

ఇక విషయానికొస్తే ఈ పాట ఓం అక్షరాయ నమః అని మొదలవుతుంది. ఈ స్తోత్రం లోని అంతరార్ధం మొదట నాకు పూర్తిగా అర్ధం కాలేదు. మనకి తెలిసినంతవరకు అక్షరం అనేది విద్యకి సంబంధించిన పదం. సాధారణంగా మనం విద్య కి అధిదేవతలుగా సరస్వతీ దేవిని కాని, గణపతి ని కానీ పూజిస్తాం. మరి అక్షరాయ నమః అనే స్తోత్రం శివుడికి ఎలా వర్తిస్తుంది? మన దేవతా స్తోత్రాలలో కొన్ని అందరు దేవుళ్ళకీ వర్తించేలా ఉంటాయి. అంటే లోకరక్షక, భక్తజనపాలక లాగ. ఇది కూడ అలాగే ఆపాదించిన ఎదో ఒక స్తోత్రం అని సరిపెట్టుకున్నాను.
కానీ కొన్ని రోజుల తర్వాత దాని అంతరార్ధం తెలుసుకున్నాను. నిజానికి అక్షరం ఒక సంస్కృత పదం. న క్షరం అని దానికి విగ్రహం. వ్యతిరేకార్ధాన్ని సూచిస్తుంది కాబట్టి ఇది నఞ్ తత్పురుష సమాసం. క్షరం అంటే నాశనం. అక్షరం అంటే నాశనం లేనిది. అంటే ఓం అక్షరాయ నమః అనే స్తోత్రం తో శివుణ్ణి నాశనము లేని వాడా అని కీర్తించినట్టు. అది కూడ పాట ప్రారంభం లో ఇలా స్తుతించటం ఎంతైనా సమంజసం.

ఓ చెలీ!

2006-11-13T05:03:00.000-08:00

శ్రీవాణీ వీణా సుస్వర గీర్వాణాలో
రాచిలకల ముద్దు ముద్దు పలుకులో
నయాగరా జలపాత ఘోషలో ఓ చెలీ నీ మాటల్!

మత్తకోకిలల ఉషోదయ రాగాలో
ద్విరేఫపు ఝుంకార నాదాలో
కరిగిన నింగి కరతాళధ్వనులో ఓ చెలీ నీ పాటల్!

ఆభోగీ రాగ ఆరోహణలో
ఉత్పలమాలా ఛంధోగమనమో
వృద్ధ గంగా వినిర్మల ప్రవాహములో ఓ చెలీ నీ నడకల్!

మన మహాభారతం తెలుసుకుందాం

2006-04-24T21:56:00.000-07:00

మహాభారతం అనేది ప్రపంచ సాహితీ చరిత్ర లోనే అతి పెద్ద రచన.సూతుడు చెప్పినట్టు ఇందులో ఉన్నదే అన్ని చోట్లా ఉన్నది.ఇందులో లేనిది ఇంకెక్కడా లేదు.చదివిన ప్రతిసారీ ఏదో ఒక కొత్త విషయాన్ని తెలియచేసే నిత్య నూతన గ్రంధం మహాభారతం.చిన్నతనం నుంచీ మనకు పరిచయమున్న మహాభారతం లో మనకెంత తెలుసో ఒకసారి పరీక్షించుకుందాం.

౧.కౌరవులు పాండవులను లక్క ఇంటిలో దహనం చెయ్యటానికి కుట్ర పన్నారని మనందరికీ తెలుసు.అయితే ఆ లక్క ఇంటిని ఏ ఊరిలో నిర్మించారు?దాన్ని నిర్మించిన వాస్తు పండితుడు ఎవరు?జ) లక్క ఇంటిని కౌరవులు వారణావతం అనే ఊరిలో నిర్మిస్తారు. ఆ ఇంటిని నిర్మించిన వాస్తు పండితుడు పురోచనుడు. పాండవులకు ఆ ఊరిపై ఆసక్తి కలగటానికి ఎల్లప్పుడూ ఆ ఊరి గురించి వర్ణించేందుకు కౌరవులు కొందరు జీతగాళ్ళను నియమిస్తారు.వారి మాటల వల్ల ఆ ఊరిపై ఆసక్తి కలిగి పాండవులు ఆ ఊరికి బయలుదేరేటపుడు భీష్ముడు వారిని హెచ్చరిస్తాడు.అంతే కాక వారు ఆ ప్రమాదం నుంచి తప్పించుకోవటానికి(సొరంగం తవ్వేందుకు) ఒక సహాయకుడిని వారి కన్నా ముందే అక్కడికి పంపిస్తాడు.
౨.పాండవుల పురోహితుడు ఎవరు? అతడిని పురోహితుని గా వారికి సూచించినదెవరు?
జ)పాండవుల పురోహితుడు ధౌమ్యుడు. అతణ్ణి వారికి పురోహితునిగా సూచించేది కుంభీనసి అనే ఒక గంధర్వ కాంత. అర్జునుడు ఈమెకు పాశుపతాస్త్రాన్ని భోధించి తాను ఆమె వద్ద చాక్షుషీ విద్య నేర్చుకుంటాడు.
౩.మహాభారతం చదివిన వారికి గుర్తుండిపోయే పాత్రల్లో మొట్తమొదటిది భీష్ముడి పాత్ర.ఆయనకి ఆ పేరు తను చేసిన భీషణ ప్రతిజ్ఞ వలన వచ్చినదే.అయితే భీష్ముడి అసలు పేరు ఏమిటి?
జ) భీష్ముడి అసలు పేరు దేవవ్రతుడు.(నిజానికి భీష్ముడు శాపగ్రస్తుడైన ధ్యో అనే వసువు అంశలో జన్మిస్తాడు.)
౪.అర్జునుడికి గాండీవి అనే పేరు ఆయన ధరించే ధనస్సు వల్ల వచ్చిందన్న విషయం మనందరికీ తెలిసిందే. అయితే ఆ విల్లును అర్జునునికి బహుకరించేదెవరు? ఏ సమయంలో?
జ)గాండీవం అనే విల్లు నిజానికి వరుణుడిది.(అందుకే మహాప్రస్థాన సమయంలో అర్జునుడు ఆ విల్లును గంగా నదిలో వదిలేస్తాడు.)అయితే ఈ విల్లుని అగ్ని దేవుడు ఖాండవ దహన సమయంలో బహుకరిస్తాడు(కారణం ఖాండవ వనాన్ని ఇంద్రుడు రక్షిస్తూండటం.)
౫.జనమేజయుడు చేస్తున్న సర్పయాగాన్ని ఆపేదెవరు?యాగం ఆగే సమయానికి ఋత్విక్కులు ఎవరిని యజ్ఞ గుండం లోకి ఆవాహన చేస్తారు?
జ)సర్పయాగాన్ని ఆపేది అస్తీకుడు.(ఇతను ఆదిశేషుడికి మేనల్లుడు అవుతాడు.అస్తీకుడు సర్పయాగాన్ని ఆపటానికై జన్మించిన కారణ జన్ముడు. ఇతను యజ్ఞ వాటికకి వచ్చి వేద మంత్రాలతో ఆ యజ్ఞం చేస్తున్న రాజుకు ఆశీర్వచనాలు చదువుతూ ఉంటాడు. రాజు అతన్ని చూసి ముచ్చట పడి ఏం కావాలో కోరుకోమనగా ఈ యజ్ఞాన్ని ఆపేయమని కోరతాడు.)యజ్ఞం ఆపే సమయం లో ఋత్విక్కులు తక్షకుడిని ఆవాహన చేస్తారు.అయితే తక్షకుడు భయంతో ఇంద్రుడి అభయం పొందగా మంత్ర ప్రభావం వల్ల ఇంద్రుడు కూడా యజ్ఞ గుండంలో పడబోతాడు. ఐతే యజ్ఞం ఆగిపోయిన కారణంగా రక్షింపబడతాడు.(తక్షకుడిని ఆవాహన చెయ్యటానికి ఋత్విక్కులు చదివే మంత్రం "సహేంద్రే తక్షకాయ స్వాహా!")

౬.అజ్ఞాతవాస సమయం లో పాండవుల మారు పేర్లేమిటి?
జ)ధర్మ రాజు: కంకభట్టు.
భీముడు:వలలుడు.
అర్జునుడు: బృహన్నల.
నకులుడు:థామగ్రంధి.
సహదేవుడు:తంత్రీపాలుడు.
౭.రణరంగం లో వీరవిహారం చేస్తున్న ద్రోణుడిని అస్త్ర సన్యాసం చేయించటానికి శ్రీకృష్ణుడు 'అశ్వత్థామ' అనే ఏనుగును చంపించి ధర్మరాజు చేత 'అశ్వత్థామ హతః' అని గట్టిగా 'కుంజరః' అని చిన్నగా అనిపిస్తాడు.ఇంతకీ ఆ 'అశ్వత్థామ' ఏనుగును చంపేదెవరు?
జ)'అశ్వత్థామ' ఏనుగును చంపేది భీముడు.(తన కుమారుడైన అశ్వత్థామ చనిపోతే అస్త్ర సన్యాసం చేస్తానని ద్రోణుడు యుద్ధ ప్రారంభంలో ప్రతిజ్ఞ చేస్తాడు.)
౮.యుద్ధ ప్రారంభ సమయంలో ధర్మరాజు ఇరుపక్షాల లో ఎవరైనా పక్షం మారాలనుకుంటే మారవచ్చని ప్రకటిస్తాడు.ఆ సమయం లో ఎవరెవరు తమ పక్షాలు మారతారు?
జ)ధర్మరాజు చేసిన ప్రకటనతో పక్షం మారేది యుయుత్సుడు.(ఇతను ధ్రుతరాష్త్రుడికి ఒక దాసి వల్ల జన్మిస్తాడు.పాండవులు మహాప్రస్థానానికి వెళ్ళే సమయం లో బాలుడైన పరీక్షిత్తు ను రాజుగా అభిషేకించి యుయుత్సుడికే రాజ్యభారం అప్పగిస్తారు.)

౯.కురుక్షేత్ర యుద్ధ సమయంలో ధ్రుతరాష్ట్రుడికి దివ్య దృష్టి ఇస్తానంటాడు కృష్ణుడు.కానీ తన కుమారులు ఒకరినొకరు చంపుకోవటం తాను కళ్ళారా చూడలేనని తిరస్కరిస్తాడు ధ్రుతరాష్ట్రుడు. కానీ కృష్ణుడు వేరే అతనికి దివ్య దృష్టి ప్రసాదించి ధ్రుతరాష్త్రుడికి యుద్ధ విశేషాలు వివరించమంటాడు.కృష్ణుడు ఎవరికి దివ్య దృష్టి ప్రసాదిస్తాడు?
జ)కృష్ణుడి ద్వారా దివ్య దృష్టి పొందేది సంజయుడు.(ఇతను అర్జునుడికి ప్రాణ స్నేహితుడు.)
౧౦.మహభారతంలో శిఖండిది ఒక ప్రత్యేకమైన పాత్ర.భీష్ముడి మీద పగతో అంబ శివునికై తపస్సు చేసి తిరిగి శిఖండిగా జన్మిస్తుంది.అయితే శిఖండి ఎవరికి పుత్రిక గా జన్మిస్తుంది?
జ)అంబ పాంచాల రాజుకి శిఖండి అనే కూతురిగా జన్మిస్తుంది.(శిఖండిని చలన చిత్రాలలో నపుంసకుడిగానూ, ఏమీ చేతకాని వాడి లాగానూ చూపిస్తారు. కానీ నిజానికి శిఖండి జన్మతః స్త్రీ. శిఖండి వరపుత్రిక కావటం వల్ల ఆమెను స్త్రీ లా కాక పురుషుడి లాగా నే పెంచుతాడు పాంచాల రాజు.యుద్ధ విద్యలూ నేర్పుతాడు.ఐతే ఆమె స్త్రీ అన్న విషయం తెలియని రాజ పురోహితులు ఆమెకు ఒక రాజకుమారి తో వివాహం చెయ్యతానికి నిశ్చయిస్తారు.చేసేది లేక పాంచాల రాజూ ఒప్పుకుంటాడు. అయితే పెళ్ళి కూతురికి ఈ విషయం తెలిసి శిఖండి స్త్రీ అన్న విషయం అందరికీ చెప్పేస్తుంది.తనకు జరిగిన అవమానాన్ని జీర్ణించుకోలేక ఆత్మహత్య చేసుకొందామని ఒక గుహలో ప్రవేశిస్తుంది శిఖండి. అక్కడ ఉన్న ఒక గంధర్వుడు ఆమె కథ విని జాలి పడి తన పురుష రూపాన్ని ఆమెకిచ్చి ఆమె స్త్రీ రుపాన్ని తాను గ్రహిస్తాడు.ఈ విధంగా శిఖండి స్త్రీగా జన్మించి పురుషుడిగా మారుతుంది.(ఆమెకు పురుష రూపాన్ని ప్రసాదించినందుకు గంధర్వ రాజైన కుబేరుడు ఆ గంధర్వుడి పై కోపించి ఆమె మరణించేంత వరకు స్త్రీ రూపం లోనే ఉండమని శపించటం వేరే కథ.)

2006-04-17T07:19:00.000-07:00

స్నేహితులారా!
చాలా కాలం నుండి పని ఒత్తిడి వలన నా బ్లాగు లో కొత్తగా ఏ ప్రచురణలూ చేయలేకపోయాను.
ఇక నుంచీ క్రమం తప్పకుండా కొత్త ప్రచురణలు చేస్తాను

విరివనంలో నా చెలి

2005-10-20T07:09:00.000-07:00

ఒకనాడు నా చెలియ విరివనం లో అడుగిడగా

నేలయడిగె ఆమె పదకోమలత్వము
సంపెంగలడిగె ఆమె మేని పరిమళము
గులాబీలడిగె ఆమె అధరాల వర్ణము
సిరిమల్లెలడిగె ఆమె పలువరుస చందము
గండు కోయిలలడిగె ఆమె కంఠ మాధుర్యము
రాచిలకలడిగె ఆమె పలుకు లాలిత్యము
మకరందములడిగె ఆమె అధర సుధారస మాధుర్యము
సుమబాలలడిగె ఆమె సౌకుమార్యము
సుమములన్నియునడిగె ఆమె కురులందు స్థానము

అన్నియూనడిగె ఆమె అంతటి అందము
మరుజన్మలోనైన ఆమె వంటి రూపము

ఈ కవితకు నేను వ్రాసిన చివరి రెండు ముగింపు పాదాలు నాకు సరైనవిగా అనిపించలేదు.అందుకే ఆ రెండు పాదాలనూ కొద్దిగా దూరంగా వ్రాసాను.
ఎవరైనా ఒక మంచి ముగింపును సూచిస్తే తప్పక దానిని ఈ కవితకు జతపరుస్తాను
భాను

హిందూ మరియూ గ్రీకు పురాణాల మధ్య సారూప్యతలు

2005-09-28T08:03:00.000-07:00

నాకు చిన్ననాటి నుండీ కథలంటే చాలా ఇష్టం.
ఆ ఇష్టం తోనే హిందూ పురాణాలలోని చాలా కథలు తెలుసుకున్నాను.
అలాగే 6వ తరగతి లో "ట్రోజన్ వార్" అనే నాన్డిటైల్డ్ చదివి గ్రీకు కథలూ తెలుసుకోవాలన్న ఆసక్తి పెంచుకున్నాను.
అలా నేను అవకాశం దొరికినప్పుడు గ్రీకు కథలను తెలుసుకుంటున్నాను.
అలా గ్రీకు కథలను తెలుసుకుంటూ హిందూ పురాణాలలోని కథలతో పొల్చి చూస్తే చాలా సామ్యములు కనిపించాయి.
నేను తెలుసుకున్న ఈ సారూప్యతలను నేను రాబోయే ప్రచురణలలో వివరిస్తాను.
చివరిగా ఒక మాట.
ఇవన్నీ నా అభిప్రాయాలు మాత్రమే. ఎవరినీ కించపరచటానికో లేక వారి అభిప్రాయాలను దెబ్బ తీయటానికో ఉద్ధేశ్యించబడినవి కావు.
ప్రమాదవశాత్తూ అలా జరిగితే క్షంతవ్యుడిని
సతీష్.

తరునమ్ ఖాన్ కి అంకితం

2005-09-22T21:21:00.000-07:00

రేకులు విచ్చిన లేత సోయగమా
వెన్నెలకే కందిపోవు నవయవ్వనమా
కన్నులలో దాచితివేమది నీలి సంద్రమా
నీ లలాటమే విశాల గగనమా
నా ప్రేమను తెలుపుటకు ఇదే మంచి తరుణమా
ఓ తరునమా!
నా మొరాలించి కాస్త కరుణ చూపుమా

భగీరధ ప్రయత్నం

2005-09-21T00:13:00.000-07:00

భగీరధుడు ఘోర తపస్సు చేసి దేవలోకంలో ఉన్న గంగను భువికి దించి తన పితరులకు పుణ్యలోక ప్రాప్తి కలిగించాడు.
ఇదీ సాదారణంగా అందరికీ తెలిసిన కధ.కానీ భగీరధుడి పూర్వులకు ఏమైనది? వారికి పుణ్యలోకాలు ఎందుకు కలగలేదు? అంటే మాత్రం ఏ కొద్ది మందో తప్పితే చెప్పలేరు.
ఇప్పుడు భగీరధుడు గంగ కోసం తపస్సు చెయ్యాల్సిన అవసరం ఎందుకొచ్చింది? చివరికి ఏమైనది అనేది ఈ ప్రచురణలో వివరిస్తాను
సగరుడు ఇక్ష్వాకు వంశంలోని రాజు. శ్రీరాముని పూర్వుడు. అతనికి యవనాశ్వుడనే పుత్రునితో పాటు అరవై వేల మంది పుత్రులు కలరు. ఒకనాడు సగరుడు అశ్వమేధ యాగము చేయుటకు తలచెను.తలచినదే తడవుగా తన కులగురువును సంప్రదించి సుముహుర్తము నిర్ణయించి యాగము ప్రారంభించెను.యజ్ఞ సమాప్తి అయిన పిదప యజ్ఞాశ్వమును వదలి దానికి రక్షకులుగా సగరుని అరవై వేల మంది పుత్రులు వెడలిరి.ఈ యాగమును చూసి ఇంద్రుడు ఇది తన ఇంద్ర పదవి కొరకై జరుగుతున్న యజ్ఞము గా భావించి దానిని భగ్నము చేయుటకై ఆ యజ్ఞాశ్వాన్ని అపహరించి పాతాళం లో ఉన్న కపిల మహర్షి ఆశ్రమములో దాచెను. అశ్వ రక్షకులైన సగరుని పుత్రులు దాని కొరకై వెదకుచూ అన్ని లోకములలోనూ గాలించి చివరకు పాతళంలోని కపిల మహర్షి ఆశ్రమంలో తమ అశ్వాన్ని కనుగొని , కపిలుడే తమ అశ్వమును అపహరించినాడని తలచి పరిపరివిధముల కపిలుని దూషించిరి. దానికి మిక్కిలి కోపోద్రిక్తుడైన కపిలుడు వారిని భస్మము చేసెను.

అశ్వ రక్షకులుగా వెళ్ళిన తన పుత్రుల జాడ తెలియక చింతించుచున్న సగరుని అతని మనుమడైన(యవనాశ్వుని పుత్రుడు) అంశుమంతుడు ఊరడించి వారిని గాలించుటకు తాను వెడలెను. అంశుమంతుడు సకల లోకాలనూ గాలించి చివరకు కపిల ముని ఆశ్రమమునకు చేరుకొని అక్కడ తమ యజ్ఞాశ్వమునూ, దాని ప్రక్కననే ఉన్న భస్మ రాశులను చూసి జరిగినది గ్రహించి కపిలుని వద్దకు వెళ్ళి పరిపరివిధముల ప్రార్ధించి తన పితరులకు పుణ్యలోకములు ప్రాప్తించు మార్గమును తెలుపమనెను. దానితో శాంతుడైన కపిలుడు అతనిని ఊరడించి దేవలోకములో నున్న గంగా జలము వారి భస్మ రాశుల పై నుండి ప్రవహించినచో వారికి పుణ్యలోకాలు సంప్రాప్తించగలవని సెలవిచ్చెను.

అంశుమంతుడు విచారవదనుడై తిరిగి వచ్చి జరిగిన వృత్తాంతమును అందరికీ వివరించెను. అంశుమంతుడూ , అతని కుమారుడైన దిలీపుడూ గంగను భువికి తెచ్చు మార్గమును అన్వేషించుచునే పరమపదించినారు. దిలీపుని కొదుకైన భగీరదుడు తన పితరులకు ఎటులైననూ పుణ్యగతులు కలిగించవలెనని యోచించి గంగను గూర్చి తీవ్రముగా తపస్సు చేసెను. అటుల కొన్ని సంవత్సరములు గడచిన పిదప గంగ ప్రత్యక్షమాయెను. ఆమెకు ప్రణమిల్లి భగీరదుడు తన పితరులను పునీతులను చేయమని ప్రార్ధింపగా, తాను దివి నుండి భువికు వచ్చు వేగమును భూమి తాళలేదనియూ , తనను భరించువానిని చూపమని చెప్పి అదృశ్యమయ్యెను. తరుణోపాయము కానక భగీరదుడు బ్రహ్మ గురించి తపమారంభించెను. కొన్నాళ్ళకు బ్రహ్మ ప్రత్యక్షమై గంగను భరించుటకు తగినవాడు పరమశివుడే గాన ఆతనిని గురించి తపస్సు చేయమని సూచించెను. భగీరదుడు పరమశివుని గూర్చి తీవ్రమైన తపస్సు చేసెను. దానికి సంతసించి పరమశివుడు ప్రత్యక్షమై వరము కొరుకోమనగా గంగ భువి నుండి దివికి దిగు సమయమున ఆమె వేగమును భరించుమని వేడగా అట్లే యని తన అంగీకారము తెలిపెను. పిదప భగీరదుడు గంగను ప్రార్దించగా గంగ తీవ్రమైన ఉద్ధృతితో పై నుండి ప్రవహించగా మహదేవుడు అద్భుతముగా తన జటాజూటిలో బంధించెను. మరలా భగీరదుడు శివుని ప్రార్ధించగా తన జటలోనుండి ఒక పాయగా గంగను వదిలెను.అటుల భువికి దిగిన గంగ తన ప్రయాణంలో ఐదు పాయలుగా విడిపోయి ఒక పాయ భగీరదుని వెంట రాగా మిగిలిన పాయలు చెరొక దిశగా నాలుగు దిక్కులకూ ప్రవహించినవి.
అటుల భగీరదుని వెంట వచ్చుచున్న గంగలో ప్రజలందరూ పుణ్య స్నానములాచరించి పవిత్రులైరి. అలా వచ్చుచున్న గంగ ఉద్ధృతికి జహ్ను ముని ఆశ్రమమంతయూ జలమయమయ్యెను.దానికి కోపించిన ఆ ఋషి భగీరదుని వెంట వచ్చుచున్న గంగ లోని జలమంతయూ త్రాగి వేసెను. భగీరదుడు ఆ మునిని ప్రార్ధించగా ఆయన తన కర్ణ రంధ్రము ద్వారా గంగను వదిలెను. అలా ప్రయాణిస్తూ చివరికి పాతళంలోనున్న కపిలుని ఆశ్రమం చేరి అక్కడ ఉన్న సగర పుత్రుల భస్మరాశుల పై ప్రవహించి వారి కి పుణ్యలోక ప్రాప్తి కలిగించెను. సగరుల భస్మరాశులు కలిసిన ఆ ప్రదేశం సాగరం గా ప్రసిద్ధి చెందెను. అటులనే భగీరదుని చే భువికి గొని రాబడుటచే భాగీరధి అనియూ, మూడు లోకములనూ పావనము చేసినది గాన త్రిపధగ(ముల్లోకముల లోనూ ప్రవహించునది) అనియూ, జహ్నుముని చే ఉద్ధరింపబడెను కావున జాహ్నవి అనియూ పలు నామములతో కీర్తింపబడుచున్నది.

ఈ విధంగా భగీరధుడు గంగను భువి కి దించి తన పితరులకు పరలోక ప్రాప్తి కలిగించెను. ఇక్కడ గమనించవలసిన విషయం ఏంటంటే భగీరధుడు తన స్వార్ధం కోసం ఏమీ చేయలేదు. తన పితృదేవులకు పరలోకప్రాప్తి కలిగించాలనేదే అతని ఆశయం.నిజానికి భగీరధుడు అలా చేయకపోయినా ప్రశ్నించేవారు ఎవ్వరూ లేరు. కానీ తనే ఎన్నో కష్టాలను లెక్క చేయక ఈ కార్యాన్ని సాధించాడు.ఇంకొక విషయం ఏంటంటే భగీరధుడు తపస్సు చేసిన ప్రతిసారీ అతనికి ఆ దేవత/దేవుడు ప్రత్యక్షం కావటానికి పట్టిన కాలం కొన్ని వేల సంవత్సరాలు అని గుర్తించాలి .

ఇప్పుడు మీరే చెప్పండి భగీరధుని పేరు ప్రయత్నానికి మారుపేరుగా నిలిచిపోవటం సమంజసమే కద!

ప్రయత్నం

2005-09-18T21:39:00.000-07:00

ఎవరైనా ఏదైనా సాధించాలంటే కావలసింది ప్రయత్నం.
మన పురాణాలలో కూడ ప్రయత్నానికి సంబంధించి చాల దృష్టాంతాలున్నాయి.
కానీ మనకు ప్రయత్నం అనగానే ముందుగా గుర్తుకు వచ్చేది భగీరధుడు.
ఎవరైనా చాలా ప్రయత్నించి (అపజయాలను కూడ లెక్క చేయకుండా ) ఏదైనా సాదిస్తే వారు భగీరధ ప్రయత్నం చేసారనో లేక భగీరదుడి లా కష్టపడ్డాడనో అనటం సర్వ సాధారణం
.కానీ మన పురాణాలలో ఎంతో ప్రయత్నించి అపజయాలను కూడ లెక్క చేయకుండా అనుకున్నది సాధించిన వారు ఇంకొంత మంది ఉన్నారు.
వారిలో ముఖ్యంగా చెప్పుకోవలసిన వారు విశ్వామిత్రుడు మరియూ ధ్రువుడు.
ఈ ముగ్గురూ ఎంత కష్టపడి తాము అన్నుకున్నది సాధించారో సవివరంగా రాబోయే ప్రచురణలలో వివరిస్తాను.

పుష్ప విలాపం

2005-09-17T05:19:00.000-07:00

నేను ప్రియురాలి సిగలోన ప్రియుని కాన్కగ మెరసి
ప్రేయసీ ప్రియుల నలరించినాను
నేను భగవత్పాదముల పై పునీతనై
తద్బహుమతిగా గ్రహింపబడినాను
ఇల్లాలి జడలోన పరిమళమై గుబాళించి
పతి అలసట పోగొట్టినాను.
నేడు దేవుని చేరిన వాని మెడలోన అలంకరింపబడి
అంటరాని దాననై చెత్త లో పడి ఉన్నాను

అజ్ఞాత వీరుడి ఆత్మ ఘోష

2005-09-16T06:17:00.000-07:00

నేనూ ఒక స్వాతంత్ర్య యోధుడిని
కానీ మహాత్ముడంత గౌరవం దక్కలేదు
దేశ మాత దాస్యశృంఖలాలను చేధించటానికి అహరహం శ్రమించాను
కానీ నేతాజీ అంత పలుకుబడి రాలేదు
ఎన్నో విప్లవ గీతాలకు పల్లవినయ్యాను
కానీ భగత్ సింగ్ అంత ఖ్యాతి రాలేదు
దేశ సేవ కోసం సర్వస్వం అర్పించాను
కానీ నెహ్రూలా ప్రధానిని కాలేదు
ప్రజలను విద్యావంతులనూ,చైతన్యవంతులనూ చేసాను
కానీ రామ్మోహన్ రాయ్ అంత సంస్కర్తగా పేరు రాలేదు
నేనూ కొందరు ఆంగ్లేయులను అంతమొందించాను
కానీ ఊధం సింగ్ లా నా పేరు మీద ఊళ్ళు లేవు
నేనూ దేశమాతను కీర్తిస్తూ ఎన్నో గీతాలు రాశాను
కానీ ఠాగూర్ లా విశ్వ కవిని కాలేదు
దేశం కోసం ప్రాణాలను కూడ అర్పించాను
అందుకే అజ్ఞాతంగా మిగిలిపోయాను.

ఈ బ్లాగు గురించి

2004-12-11T05:59:00.000-08:00

నాకు తెలిసిన, తెలుసుకున్న విషయాలు మీ అందరితో పంచుకోవటం కోసం ఈ బ్లాగుని ప్రారంభించాను.
కానీ ఎందుకో ఎక్కువ కాలం నా బ్లాగులో వ్రాయలేక పోయా. ప్రతి సారీ ఏవో ఒక విఘ్నాలు. పని ఒత్తిడి కానీయండి, నా వ్యక్తిగత విషయాల వల్ల కానీయండీ ఏదో ఒక అవాంతరం వస్తూనే ఉంది. ఈ సారి రోజుకి ఒక టపా వ్రాయాలని ధృఢంగా నిశ్చయించుకున్నాను. మీ అందరి ప్రోత్సాహంతో నా ప్రయత్నం లో సఫలీకృతుణ్ణి అవుతానని అనుకుంతున్నాను.